أولاً فيه خدمة أو اختيار بمعنى أصح فى المواقع الصينية أنك تشترى وتدفع والمنتج يتشحن لعنوان شخص أخر والموقع بيحذف اى لو جو او علامات تدل عليه والخدمة دى اسمها (DropShipping or Reseller) يعنى بمعنى اصح تشتغل كبائع.
أنا جربت الخدمة دى فى الفيديو التالى والحقيقة كويسة جدا أنك مش هتحتاج ان المنتج يجيلك وبعد كده تبعته للشخص وتقدر تشترى لناس خارج دولتك وتاخد عمولة ولكن متعمدش على اسلوب زى كده فى الربح لان المتوقع بعد فترة أن كل شخص هيقدر يشترى لنفسه.
– عموما أنا سجلت التجربة بشكل كامل فى هذا الفيديو وكنت هحذفه لمشاكل حصلت لان الشخص رفض يستلم المنتج بسبب ارتفاع الجمارك ولان كمان مفيش فاتورة وللأسف أتقيمت بضعف سعرها الأصلى على الموقع ولكن فوجئت أن الموقع بعتلى رسالة انه هيشارك بنصف الجمارك ولما اتصلت بخدمة عملاء ارامكس قوله مفيش كده بعده قالولى ان الموقع دفع الجمارك كلها وبعد ما الشخص استلم المنتج الموقع بعتلى فاتورة بنصف الجمارك ودى كانت أغرب تجربة صادفتها بصراحة حتى الأن بس خلت الفيديو ليه معنى 
أهم النصائح الخاصة بعملية الشراء والتسوق عبر الإنترنت
1- أولا فيه مواقع متميزة فى الإلكترونيات ومواقع اخرى جيدة فى الملابس ومواقع اخرى فى المنزل والصحة وإلخ فلازم تعرف كل موقع متميز فى ايه وتشترى الشئ ده منه وحاول تعمل حساب شوب اند شب لو مهتم فعلا بالتسوق من الإنترنت وده كوبون (PP1HOLIDAY) هيخلى ثمن العضوية 1$ بدلاً من 45$ والمبلغ ده مرة واحدة مدى الحياة والعنوانين بتزيد مع الوقت وسعر الشحن بارامكس رخيص.
2- قراءة تفاصيل كل منتج وتعليقات المشترين جيداً ويفضل مشاهدة الفيديوهات الخاصة بالمنتج على اليوتيوب.
3- مقارنة أسعار المنتجات + سعر الشحن واختيار الأفضل والأرخص بالنسبة لدولتك.
4- الشراء وقت العروض ذات الخصومات الكبيرة مثلاً فى الأعياد والمناسبات والإحتفالات السنوية.
5- لا يفضل انك تشترى شئ ب20 دولار مثلا وتستخدم شحن سريع ب10$ ولو استخدمت البريد العادى المسجل فى مصر غالبا ممكن تلاقى الرسوم 100% ومفيش معيار إنما شركات الشحن الخاصة هى اللى ليه نسبة محددة ويفضل تجميع المنتجات المطلوب شرائها مرة واحدة بدلاً من شرائها بشكل منفرد توفيراً فى مصاريف الشحن والجمارك يعنى طلب على الاقل يكون +50$ واستخدم شحن سريع لا يتعدى قيمته 10$ وكل ما جمعت اللى انت عايزه مرة واحدة كان أفضل واوفر.
6- الحد الأدنى للجمارك فى مصر مفيش ياحبيبى الكلام ده فتانى حاول تجمع كل اللى أنت عايزه مرة واحدة وتستخدم شحن سريع ولكن أحيانا ممكن تستلم الطرد بدون جمارك لكن مثلاً فى الإمارات حوالى 1000 درهم 
وهنا بقه لو انت عايش فى الامارات قسم طلبياتك بحيث كل طلبية لا تتعدى ال1000 درهم اللى هما حاليا فى حدود 270 دولار (مش عارف كتبت حاليا ليه!) عموما ده مبلغ يوفرلك شحن سريع مجاناً + إنك مش هتدفع جمارك يعنى تستلم المنتج بسعره الرسمى الموجود على الموقع.
– نجهز بقه تأشيرة الإمارات بس لازم نرجع تانى على 2030 بيقولك هنبقى أحسن من الإمارات فى النت 
7- يرجى الحذر من شراء منتجات محظور استيرادها وبالنسبة لأغلب الدول العربية فهى الأسلحة بمختلف أنواعها وحتى الأسلحة البيضاء والأقنعة (أصل المظاهرة أو العملية الإرهابية مش هتم من غير القناع اللى هتشتريها من النت) وأجهزة الرؤية الليلية والأجهزة والساعات التى تحتوى على كاميرات سرية والسيارات أو طائرات التحكم عن بعد؛ وأشياء أخرى على حسب كل دولة ويمكن معرفتها من شركات الشحن مثل Aramex أو DHL
– كده أنا غيرت رأيى نجهز تاشيرة لاوروبا أحسن بس محتار بصراحة تى اى داتا عمل عرض ميجا بلس أوروبا ياحسين أوروبا 
وأخيرا أى إضافات أو تعديلات هتجدوها فى هذا الموضوع على مدونة.